I hätt ma nia dacht, dass i moi auf de Idee kim, a Buch raus zum bringa mit selbst geschriebenen Kinderliedern.
Klar...I hob de Ausbildung zur Kinderpflegerin und mit den Kids immer am liabsten gsunga und Musi gmacht (daher bin i wahrscheinlich a irgendwann nur nu "Musi-Vroni" gnannt worden) aber de Idee, sich moi mit am Kinderlied zu versuchen, war ehrlich gesagt nia präsent.

Erst durch de Umstellung von da selbstständigen Musikerin / Harfenlehrerin auf den Vollzeit Job "Mama", hob i gemerkt, wia wichtig mir de Musi is und wia wichtig mir in dem Fall is, dass mei Kind de Musi ois wos empfindet, wos einfach zum Leben dazua ghört.

I kenn zwar wirklich viele Kinderlieder, aber fast koa auf boarisch. Und dass i meim Kind Lieder auf hochdeutsch vorsing, is ma irgendwie ned richtig vorkemma. 
De Kinder de i kenn, redn spätestens in da Schule nimma so sche boarisch, wia dahoam, von daher wars ma einfach z´boid.

So is dann as erste Liad entstanden. As Tierlied. Des a mit Abstand as leichteste Lied vom Buch is, weil mei Kind damals a erst a paar Monate oid war.